Abolition & Liberation in Curaçao, 8/06 (English)

ABOLISHON I LIBERASHON NA KORSOU

“NOUS SOMMES ICI POUR VAINCRE OU MOURIR”
“NOS T’AKI PA VENSE O MURI”

Eugène Godfried 

Spesialista di Karibe/periodista/outo/aktivista sosiokultural/
Trahadó komunitario/investigadó

Yomini Godfried
fotoreportera
Yomini’s Productions
yominigirl_AT_hotmail.com (_AT_ = @)


1. INISIO DI PROSESO DI TOMA DI KONSIENSIA 

Na aña 1977 mi a drenta servisio komo trahadó sosial – kulltural komunitario di Hubentut 70, situá na Penstraat 55, Willemstad, Kòrsou. Hubentut 70 a keda fundá un aña despues di akontesimentunan di 30 di mei 1969. A kuminsá un époka nobo di demokratisashon den kuido di hubentut na Kòrsou. Inisiativanan no - elitista, pues awor di pueblo, a kuminsá aparesé. Bosnan nobo ku tabata kuestioná e sistema politiko, ekonómiko, sosial i kultural kapitalista dominante. Hubentut 70 a desaroyá segun e modelo di akshon sosial aki. Un organisashon di pueblo humilde progresista, anti – kolonial na fabor di hustisia sosial i koperativismo. 

Pues, e mesun aña di mi yegada for di Hulanda pa establesé mi mes definitivamente na Kòrsou, direktiva di Hubentut 70 a tuma inisiativa di pidi permiso ( = vergunning) ofisial na polis pa organisá konmemorashon di 17 di agosto 1795 riba Ref. Esaki ta pa retomá un tradishon ku tabata eksistí promé ku esaki i ku pa motibunan deskonosí a bin flohá i kasi disparse. Pues, tabatin otro ku a kumpli ku e tarea aki promé ku nos. Nos a sigui nan.

Mi a fungi komo responsabel di e permiso ofisial (vergunninghouder) menshoná algun aña ku a sigui. 

Den promé instante respuesta públiko tabata mediano, pero poko poko interés a bira mas i mas grandi.Varios persona tabatin miedu plenamente ku lo bini algun forma di represaya si pueblo hasi akto di presensia na e aktividat konmemorativo aki. E struktura di programa tabata konsistí básikamente di diskursonan tantu di parti di invitadonan komo di representantenan di Hubentut 70. Tambe tabatin manifestashon kultural ku aktuashon di diferente artista i grupo manera Trinchera, Ban Uni, Doble R.

Kontròl polisial tabata serio, pero nunka tabatin insidente. Sinembargo, tabata reina un ambiente di vigilansia i deskonfiansa komosifuera hobennan rebelde di Hubentut 70 lo bai insitá otro lantamentu manera na 1795 o manera mas resien 30 di mei 1969. E aktividatnan a sigui tur aña bou di guia di e organisashon di hubentut konsiente i progresista aki sin ningun miedu pa forsa di represhon di sektornan elitista. Ni tampoko a interesá e organisadornan hubel si a eksistí duda o desaprobashon serka e sistema politiko - ekonómiko dominante. 

Segun añanan ta sigui mas interés ta lanta serka otro individuonan i gruponan. Nan tambe ta aspirá pa organisá aktividat riba e fecha memorable aki. Solidariamente direktiva di Hubentut 70 ta entregá responsabilidat di organisashon di 17 agosto den man di otronan. Mester stipulá enfátikamente ku na tur okashon nos a sigui asesorá nos kolega Gilbert Gibi Bacilio ku algun aña despues a asumí presidensia di un plataforma organisadó di e evento anual aki.

Mi a disidí skirbi e ensayo aki pa kuminsá un proseso di reportahe i diálogo. Nos aktivistanan social – kultural – komunitario mester kompilá i perpetuá eksperenshanan bibá pa e propio gremio aki. No tabata nada fásil opera den situashon i sirkunstansianan varios biaha hostil i di persekushon. Elite dominante posesklabista di siglo XX ku a toka nos konosé no tabata nada fásil ku inisiativanan di pueblo. Sigur si e sektornan aki no tabata dominá o kontrolá e inisiativanan aki ni via métodonan misterioso. Intoleransha ta grandi i meskos ku den époka skur di sklabitut. E propio sistema pa garantisá su eksistensha a prepará i mobilisá su ‘slaven en vrijwilligerskorps van negers en mulatten’ pues su ehérsito di boluntarionan o asalariadonan di desendensia afrikano pa bai dilanti i hasi e trabou sushi pa nan di bringa i aplastá nan mes rumannan di mesun orígen sosial diskriminá i eksplotá. E mesun modelo nefasto aki ta keda ripití kada bes di nobo den diferente forma i estilo. 

Dr. Fidel Castro Ruz, Presidente di pais soberano alabes independiente, Cuba a yega di señalá, ku pa motibu di tantisimo okupashon nos ta haña nos mes strobá di skirbi nos historia nos mes. Pero, nos mester konsiderá komo nos obligashon di registrá nos eksperenshanan pa usufrukto alabes bienestar di futuro generashonnan. Un bèrdat apsoluto e ilustre ponensha aki. 

Nos ta sigui eksponé algun idea konserniente luchanan di nos pueblo.

2. AÑA 1750 PRELUDIO DI EKSPLOSHON 17 AGOSTO 1795
PROMÉ INTENTO DI PUEBLO PA LOGRA ABOLISHON NA KÒRSOU 

Na varios okashon por tende diskushon tokante importansha di lucha hibá pa sklabisadonan di Kòrsou. Tin hende ta puntra si en bèrdat a lucha pa emansipashon. Algun bes hasta sa bisa ku na 1863 Hulanda a regalá bondadosamente emansipashon. Esaki ta kolmo di eurosentrismo!

Práktika a mustra ku sklabisadonan semper a duna resistensia sea pasivo o aktivo kontra di sklabisashon tambe di dominio kolonial hulandes. Pasivo tabata tur forma di supuesto aseptashon di manifestashonnan di dominio kolonial sklabista, pero na mes momentu den nan mes grupo ta pensa, papia i hasi kompletamente otro. Otro forma ta hui bai den mondi na Kòrsou mes o kohe boto o loke sea bai kosta di Venesuela. Varios hòmber i muhé a preferá kome salu o tera kometiendo suisidio antes di sukumbi i kai na amen di opreshon. Loke a drenta archivonan di historia komo rebelion di katibu o sea na hulandes ‘slavenopstand’ tabata presisamente protesta o rebeldia aktivo militante kontra di sistema inhumano di sklabitut. Tabatin varios eksploshon di e tipo aki. Historia ofishal ta destaká djadumingu 5 di yili 1750. Fecha riba kua revolushonarionan, ku ta suponé di ta original di zona di loke awor aki ta yama Ghana, a lanta na Hato kontra di opresornan sklabista i algun di nan kolaboradónan traishonero di desendensia afrikano. Pues, tabata trata di un ekspreshon kontra di e sistema di opreshon i eksplotashon den su totalidat. Historia ofisial kier desviá atenshon di tur hende papiando di krueldat kometé pa algun di e rebeldenan kontra kolonialistanan ‘blanku’ aparentemente inosente. Esaki ta otro intento pa poder ofisial trata di limpia su mes kara i shusha esun di su viktima.

Den e konteksto di protesta i rebeldía aki mester komprendé e proseso revolushonario di 5 di yili 1750. Un lucha pa liberashon ku a keda brutalmente suprimí pa forsanan militar kolonial hulandes.

Puente na Plantashi Sòrsaka kaminda for di riba kua kumpradónan di Katibu ta opserrvá nan merkansia humano ku ta pasa bou pa ekshibishon. E Puente di krimen aki ta situa banda e kas grandi (landhuis) ku ta residensia Di funshonario kolonial Teniente Gobernadó (Gezaghebber)

Historia ofisial ta papia ku hubilo di su aktuashon represivo. Ningun análisis outokritiko ta tuma lugá di banda di e ‘vensedornan’. Nan ekspreshonnan ta kargá ku prehuisio kontra di afrikanonan aki ku den su mayoria aparentemente a yega Kòrsou for di puntonan di kaptura i benta na El Mina, aktual teritorio di Ghana. Estudiosonan ghanes ta splika ku nashon di Ashanti, Fanti i otronan den e region ei tabata konosé un desaroyo sosio – ekonómiko importante. Nan tabatin un sistema politiko di tradishon demokrátiko ku tabata eksistí muchu antes yegada di portuguesnan. E nashonnan aki ya tabatin un tradishon i organisashon militar respetá. Pues, na momentu ku europeonan a invadí nan imperio tur kos a kambia.Desorden a bira regla. No ta straña nos ku esnan ku a keda sklabisá i mandá prezu Kòrsou, den varios kaso lo tabata hòmber i muhé ku formashon, konsiensia i naturalmente rebelde. Europeonan kolonial sklabista, klaramente, lo a preferá afrikanonan sumiso ku poko kultura i konsiensia libertario. 

3. MARTIRNAN DI 1750 SEMPER KU NOS

E Kastigunan ku e sistema kolonial a imponé riba rebeldenan afrikano ku a partisipá den lucha di 5 di yili 1750 tabata sumamente fuerte. A deportá ocho hèmber tambe sinku muhé. A kòrta kabes di dos hòmber i un muhé. A mutilá varios i despues ranka nan kabes kit’afó. A kima kueru di algun kita for di nan kurpa ku heru kayente. A koba saka nan kurason for di nan kurpa pa despues kita nan kabes afó. 

No opstante e fin sangriento aki, no por a para e afan i deseo popular pa kaba ku e sistema kruel di sklabisashon. Aña 1750 ta antesala di otro eksploshon ku a tuma lugar kuarentisinku aña despues dia 17 di agosto 1795.

Heroenan i martirnan di lucha pa abolishon i liberashon di sklabisadonan afrikano na Kòrsou di 5 di yili 1750 na Hato ta keda eternamente grabá den nos memoria. Nos ta menshoná algun ruman manera, entre otro, Kodjo, Kwaku, Kwamina, Kakaraba, Ajiribi, Lucresia, Magdalena, Kofi, Akuba, Apia, Kwapasu, Diana, Servina, Amba, Afiba, Kwasi. PREKURSORNAN DI LUCHA KONTRA KORUPSHON.

Estatua na Ref simbolisando lucha pa libertashon. Resultado di dékadanan di insistensha di parti di varios kolaboradó. Un palabra humilde di rekonosimentu pa esfueso di nan tur.

4. ABOLISHON MEDIANTE RESPONSABILIDAT PROPIO – 17 DI AGOSTO 1795

Afrikanonan sklabisá a demostrá di ta posee mas konosimentu i konsiensia politiko ku nan opresornan. Nan tabata plenamente na altura ku Hulanda for di mei 1795 a kai den man di patriotanan republikano antimonarkista sklabista. A krea Repúblika Batava, ku tabata subordiná na Fransha. Tabata konosí pa e pueblo sklabisá ku Konvenshon di Fransha revolushonario a haña su mes obligá di rekonosé abolishon di sklabitut na 1794 den teritorionan kolonisá p’e manera Haiti i Guadeloupe. Un aña antes ya afrikanonan a kibra kadena di sklabitut nan mes den e paisnan ei. Por bisa ku virtualmente ya kaba afrikanonan haitiano meskos ku na Guadeloupe tabata goberná nan mes. E enseñansa aki tabata klaramente presente serka e pueblo di Kòrsou. Tambe tabata fresku den memoria di varios, ku djis serka na Coro a tuma lugá un gran lantamentu pa liberashon di afrikanonan sklabisá ku partisipashon di yunan di Kòrsou, manera entre otro Josef Caridad Gonzalez, man drechi di José Leonardo Chirino.

Esun ku no kier a komprendé bon e asuntu aki tabata Gaspar Lodewijk van Uytrecht di plantashi Kenepa. Dia 17 di agosto 1795 a bira kla p’e ku su klase sosial no tabatin gara mas riba e masa sklabisá. Nan a ninga di bai traha. Van Uytrecht a disidí bai Willemstad pa kuminsá organisá reakshon represivo riba masanan den lucha. 

Revolushonarionan a skohe komo nan lider Tula, Bazjan Karpata, Pedro Wakao i stratega militar Louis Mercier. De facto, e pueblo a kibra kadena di sumishon i deklará su mes liber i igual na tur hende riba e mundu aki. Esaki nan a eksigui élite dominante di Kòrsou aseptá Pa e revolushonarionan ku tabata aspirá kambio pa progreso i hustisia sosial no tabata eksistí ningun motibu di kere ku e klase di shonnan, doño di plantashi i komersiante di sklabisadonan lo no bai emprendé aktividatnan reakshonario represivo. P’esei mester a defendé prinsipionan sagrado di liberashon ku alma i kurpa. E mesun armanan ku kolonialismo tabatin depositá na diferente parti di e isla a sirbi tambe pa defendé pueblo kontra inhustisia. 


5. JACOBUS SCHINCK – MISIONERO KOLONIAL

Kolonialismo hulandés tabatin un pakto di kolonisashon ku Iglesia Katóliko pa kristianisashon di masa afrikano sklabisá di Kòrsou. Iglesia Protestant Reformá i Iglesia hebraiko di hudiunan tabata pa e faktornan koló ‘blanku’.Pues di e sektornan elitista. 

Den e kuadro di responsabilidat aki e hefe di mishon katóliko Jacobus Schinck, saserdote fransiskano di 47 aña, a uni su mes ku ehérsito kolonial komandá pa van Westerholt i bai papia ku un ‘sklabisado’ afrikano, pues no un ‘liberto’.Pader Schinck tabata plenamente komprometé ku e sistema sosial dominante. El a tuma komo su tarea ‘intermedia’ entre gobièrnu kolonial sklabista i revolushonarionan. Den práktika el a spera ku komo ‘lider spiritual’ di sklabisadonan i su kapasidat di prediká segun tradishon di su orden fransiskano, ku sigur e lo a logra konvensé rebeldenan di bolbe bou dominio di shonnan. Asina lo por a restablesé òrdu bieu di sumishon. 

Tula i kompañeronan a demostrá di komprendé mensahe libertador di evangelio mihó ku e saserdote fransiskano aki. Nan a rekord’e ku evangelio ta boga pa igualdat entre tur ser humano. Pues, no ta riba kuestionnan politiko so rebeldenan tabata bon informá, pero tambe den kuestionnan teológiko di liberashon di pueblo oprimí.

E vishon eurosentrista tokante konosimentu i aktitut religioso di afrikanonan ta deskribí e enkuentro solèm ku sklabisadonan a organisá antes di kuminsá proseso di lucha komo algu misterioso i sospechoso. Nos ta referí na e seremonia enkabesá pa e saserdote di pueblo Miguel Bulbai. E ritonan ku ta keda deskribí ta rekordá manifestashonnan similar konosí den Vudú di Fon na Dahomei/Benin o tambe ekspreshonnan Mayombe di region di Kongo, o hasta Yoruba di region di Nigeria, Dahomei/Benin. Den tur e religionnan afrikano aki ta aparesé e puiru blanku, polvo di kachu di kabritu, kachu di kabritu, aguardiente (no pekelwater). 

Den Karibe ta kustumber di afrikanonan sklabisá di realisá manifestashon religioso pa yama danki na Todopoderoso i pa pidi su Bondat pa éksito di bataya libertario. Na Haiti, por ehèmpel, na agosto 1791 promé ku inisio di lucha a tuma lugar un enkuentro religioso na Bwa Kaiman dirigí pa Bukman. Tabata un enkuentro Vudú.

Pa Jacobus Schinck tabata un konfrontashon kultural grandi ku e no tabata por ni tabata prepará pa komprendé. Riba su insistensia pa hiba un respuesta positivo pa komandante van Westerholt i gobernadó Van Veer, sklabisadonan sin basilashon a respondé:

“NOUS SOMMES ICI POUR VAINCRE OU MOURIR”

“NOS T’AKI PA VENSE O MURI”

“NOS KIER NOS LIBERTAT!!!”

Mishon kumplí di ambos banda. Jacobus Schinck por a bai Punda atrobe riba kabai. Esaki tabata possible grasias na kortesia di rebeldenan pa fasilitá su biahe.

6. LOUIS MERCIER KOMANDANTE EHÉRSITO DI LIBERASHON DI PUEBLO

Intransigensia i seramentu di tur porta i bentana di diálogo demokrátiko ta abri kaminda nesesariamente pa un salida di forsa pa negosha solushon di situashonnan krítiko. Pa tur sektor, tambe komunidat di sklabisadonan tabata konosí ku Rei Willem V a hui bai Inglatera. Ounke Rei Willem V huntu ku su seguidornan tabata kier protekshon di Inglatera pa Korsou, sinembargo, ya Repúblika Batava a keda institui for di 16 di mei 1975. Pues, lei franses ta na vigor. Pues, e posishon di wanta duru yen di sobèrbia di parti di klase di shonnan sklabista ta eksigui un solushon mas kontundente ku firmesa. Nan sigur lo usa forsa militar pa aplastá kualke protesta popular. Esei no tin duda. 

Di otro parti afrikanonan sklabisá a tuma medidanan nesesario apuntando komo nan estratega i komandante di ehérsito pa liberashon e dinámiko lider Louis Mercier. Ku impreshonante kapasidat organisativo Louis Mercier a organisá gran kantidat di rumannan riba diferente plantashinan manera entre otro Santa Krus i Porto Mari. Despues pa kita posibilidat di atake sorpresivo di parti di forsa armá kolonial komandá pa Plegher, forsanan rebelde bou di mando di Louis Mercier a kapturá unidat di komandante kolonial Van der Grijp na Santa Krus I tambe di Thieleman na Kenepa. Entre esnan arestá tabatin algun desendiente afrikano kolaboradó ku e sistema kolonial.

Gobernador Jacobus van Veer, tabata keda remplasá de bes en kuando pa Michiel Römer. E persona aki tabata okupá puesto di Slavenhandel = Komèrsio di Katibu den e Konseho Kolonial ku tabata goberná Kòrsou i otro islanan. E kuerpo aki a disidí intensivá ofensiva kontra revolushonarionan. Nan a mobilisá Westerholt i despues Heshusius pa bai masakrá rebeldenan. Ta notable ku semper e sistema dominante tin abilidat pa involukrá desendientenan afrikano tambe pa bai hasi trabou shushi pa nan kontra di nan rumannan di klase. Asina tabata eksistí un asina yamá ‘korps vrije negers, mulatten’ bou di komandansia di un desendiente di afrikano Marcus Anthony.

E fenómeno aki di traishon a eksistí durante hinter temporada di sklabitut i kolonialismo te ku dianan presente manifestá den diferente forma. Louis Mercier akompañá pa otro lidernan tabata na altura di e situashon aki. Nan no a hasi ningun distinshon. Marcus Anthony tambe a kai prezu na su debido momentu. E lucha tabata integralmente anti opreshon, antieksplotashon pa liberashon di un i tur. 

Louis Mercier, di desendensia afrikano via Haiti o tal bes Guadeloupe, a demostrá di posee konosementu ku ta surpasá tur frontera geográfiko. Su kalidat militar a keda ampliamente probá den tur batayanan hibá inkluyendo hazañanan na Ser’i Neger. Kòrsou virtualmente tabata den man di revolushonarionan na e momentunan ei. En todo kaso Banda Bou. Mester konta tambe importansha di sosten di sklabisadonan te Bandariba. Na Santa Catharina i bisindario sklabisadonan ya a lanta pa nan libertat. Tur sklabisado tabata anhelá abolishon. 

Kosta di Ref esena di masakre

7. DIA 3 DI ~OKTOBER 1975 – DIA DI MASAKRE RASISTA ANTI – AFRIKANO 

E métodonan sistemátikamente usá pa ehersé represhon i supreshon di e proseso revolushonario ku a kulminá dianan di agosto i sèptèmber di 1795 tabata un masakre. E klimaks di tur kos tabata e sentensia diktá pa e poder ofisial den persona di Gobernador van Veer akompaña pa su Konseho Kolonial. Posteriormente, a sigui dia 3 di òktober 1795 ehekushon brutal i sangriento riba Ref di lidernan revolushonario Tula, Karpata, Luis Mercier, Pedro Wakao tambe otro kompañeronan. Un akto sumamente kruel. E intenshon tabata paralisá kualkier movementu pro liberashon di esklabisadonan yenando miedu i pániko den kurpa di kada siudadano. Elite kier a sigurá ku no por tin repitishon di Haiti, Coro ni Kòrsou mes tampoko. E señalamentu ta ku lo no tolerá mas nunka surgimentu di ningun lider bou di pueblo. Ta permití solamente sumishon, obediensia i entrega na sistema kolonial monarkiko. Pues, hende ku identidat cultural deformá. 

8. DIA 1 DI YILI 1863 – ABOLISHON FINAL 

Pueblo oprimí a sigui resistí na diferente forma sistema di sklabitut i kolonialismo hulandes. Esaki a sosodé aktivamente i keda suprimí pa forsanan represivo ofisial. Tambe a apliká leinan ku ta limitá moveshon di hende di koló den sentido general. Además, protesta i soberbia a sigui manifestá su mes pasivamente atrabés di otro medionan no di konfrontashon agresivo. Por ehèmpel, persistensia den uso di idioma papiamentu, músika di origin afrikano manera tumba, tambú, muzik di zumbi, seú, e.o. Pa medio di ekspreshonnan kultural protesta i konsientisashon a sigui mobilisá esnan oprimí di situashon eksistente ku e meta pa prepará nan pa kambio. Finalmente, mester tuma na kuenta eksperensha di otro islanan manera lantamentu di sklabisadonan afrikano na Bonèiru dia 10 di novèmber aña 1834. Di otro banda, Gran Bretaña despues di luchanan tenas a disidí abolí ofisialmente sistema di sklabisashon den su teritorio na 1833 pa finalisá na 1838. Fransha tabatin ku tuma na kuenta ku tantu na Martinique komo Guadeloupe sklabisadonan a bolbe lanta en firme i atrobe e kategoria sosial aki mes a proklamá abolishon. Gobièrnu fransés ku apoyo di Victor Schoelcher ku a simpatisá den parlamento na Paris ku sklabisadonan a disidí rekonosé abolishon ofisialmente na luna di mei 1848. Gobièrnu Danés no tabatin otro opshon di sukumbí pa insistensha di sklabisadonan i na mesun aña 1848 ofisialmente a abolí sklabitut.

Kolonianan hulandés no tabata den ningun sentido diferente. San Eustakio a konosé lantamentunan serio i San Martín tambe. Pakiko na paisnan bisiña sí a abolí sklabitut i esnan hulandés ta basilando? Hulanda a hañ’e oblige di rekonosé deseo di afrikanonan sklabisá di e islanan aki aña 1848.

Kon bini na Kòrsou, Bonèiru, Aruba i Surinam mester a warda diessinku (15) aña mas promé ku poder kolonial disidí abolí sklabitut. Nos ta rechasá tur mitonan ku kier pretendé ku katibunan no tabata kier kambio di e situashon reinante. E motibu fundamental tabata e hecho ku sklabistanan tabata eksigui daño i perhuisio di poder kolonial pa kada katibu ku haña libertat. E élite sklabista aki ta konsiderá perdida momentu ku un trahadó ku tabata ofisialmente su propiedat komo bestia o materia sin pago pa su labor ni un solo dia ke o ta haña su derecho di ta ser humano liber.

Monseñor Martinus Niewindt, e mes sklabista, a kolaborá na tur forma ku e sistema politiko dominante pa yega na un solushon negoshá di abolishon. Su iglesia Katóliko lo enkargá su mes ku edukashon i kuido sosial – kultural di afrikanonan. Di e manera aki por abolí sklabitut ku ta eksigensia di su feligresenan afrikano o hende di koló, mientras na mes momentu lo perkurá pa e almanan aki sigui aseptá dominio kolonial hulandes sin diskushon. Klaro, lo mester gratifiká su kleronan i hierarkia permitiendo konstrukshon di mas tèmpel i otro benefisionan material pa kleronan. 

Tur kondishon spiritual-psikológiko tabata kla prepará. Solamente kondishonnan material mester kaba di atendé na benefisio di klase di shonnan. Indemisashon pues. 

9. KUA TABATA E SITUASHON NA HULANDA? 

Entre tantu na aña 1856 gobièrnu di Hulanda ta entregá un propuesta di lei motivando abolishon di sklabitut den parlamentu (Tweede Kamer) ta keda rechasá. Loke tabata preokupá esnan ku a bai kontra di idea di abolishon tabata loke nan ta konsiderá konsekuenshanan finansiero ku lo esaki lo tin pa ekonomia di paisnan kolonisá i Hulanda. Seis aña despues otro propuesta di lei di gobièrnu a keda aseptá pa parlamentu hulandés. A logra garantisá, presisamente, loke e klase di eksplotadánan di plantashi i katibu tabata kier.

Doñonan di plantashi na Sürnam ta haña kompensashon di 300 florin riba kada katibu. Na Antillas doñonan ta kobra 200 florin pa katibu. Eksplotadónan di plantashi na San Martín por a konta ku pago di 100 florin pa kabes di kada katibu. 

Pues, tardansa na rekonosé loke via medionan pasífiko sklabisadonan afrikano a eksigui i anhelá tabata pa motibu di interés i blokeo di kapanan elitista sklabista ku no kier a laga e sistema oprobioso di eksplotashon alabes opreshon humano aki bai. Si tabatin algu di regalá anto ta e klase priviligiá aki, manera kustumber a regala su mes plaka di indemnisashon. Tabata trata di sèn pa saku di Shon i no interés di hende.

Mester konmemorá dia 1 di yili 1863 komo viktoria di pueblo. Sistema kolonial sklabista tabata oblige dal paso atras i rekonosé boluntat di pueblo. No konmemorashon di e fecha aki ta nifiká komplasé sektornan ku ta preferá falsifiká historia en bes di siña pa futuro. 

10. REVOLOSHON INDUSTRIAL I IDEOLOGIA LIBERALISTA 

Sigur ta un hecho ku revolushon industrial ku a tuma lugá na Inglatera a introdusí un proseso di transformashon den sistema di produkshon kapitalista riba eskala internashonal. Esei a hasi e sistema di sklabitut bira redundo alabes opsoleto. Pues, no tabata tin nodi mas di dje. P’e motibu ei mes antiguo komersiantenan di katibu a invertí den estudionan pa yega na mashin di bapor ku lo mester remplasá man di obra humano poulatinamente. E motibu prinsipal tabata pa Inglatera bai kontra di su desertornan na Merka ku a bira independiente apoderando di komersio i eksplotashon di sklabisadonan afrikano. Inglatera a inisiá un proseso di kompetensia tenas kontra su eks – kolonia, Merka. Fervientemente e pais aki a kuminsá persigui komersio di katibu afrikano pa despues bai na fabor di abolishon di sklabitut mes. 

Entre tantu Inglatera a intensivá proseso di kolonisashon di kontinente afrikano mes i no tabata konbeniente saka forsa di labor for di e gran kontinente aki pa manda afó. Kompletamente kontrali, pasobra mester di forsa di labor awor na Afrika mes. Di tur manera situashon ekonómiko i politiko internashonal a kambia. 

Ideanan humanista a kuminsá gana tereno. Fransia ku Victor Schoelcher i Les Sociétés d’amitié avec les Noirs, na Inglatera Wilberforce i diferente asosiashon na fabor di abolishon di sklabitut i trata di katibu. Diferente otro pais europeo tambe a konosé organisashonnan humanitario liberalista ku tabata boga pa abolishon di sklabitut. Por ehèmpel “Maatschappij voor Afschaffing van de Slavernij”. 


LITERATURA KONSULTÁ I REKOMENDÁ

- SKLABITUT I REBELION 1795
Charles Do Rego
Isbn 99904-0-137-3

- TULA
j. Hartog 

- DAG VAN PROCLAMATIE
Ñapa Amigoe zaterdag 24 juni 2006

- SLAVERY AND CAPITALISM
Eric Williams
Trinidad & Tobago

- JUST A MATTER OF GENOCIDE
Ward Churchill
Boulder
Colorado
U.S.A.

- LOUIS MERCIER: UN INTERNASHONALISTA 
Jeanne Henriquez
Willemstad 
Curaçao

- BUSCANDO A DIOS EN EL CARIBE
Armando Rudy Lampe
Aruba

- ZWARTE HUID BLANKE MASKERS
Frantz Fanon
Van Gennep bv nes 128
Nederland